大年初八，天氣時冷時熱，又加上新年芊嶠又食糖，又食熱氣食物，今次嶠媽就介紹三棗蘋果雪梨茶，甜甜地，大人小朋友都鐘意飲，材料又容易買，又容易煲！
三棗茶有咩好？原來把紅棗、南棗及蜜棗一齊煲，除左對補氣血更有效用之外，因為棗類都有抗敏感作用，所以對氣管敏感而引致的咳嗽都會有調理作用。補得來又唔會太上火，所以好適合小朋友飲用。
至於加埋蘋果和雪梨，除了味道會更甜外，還非常滋潤，可以有滋陰潤燥之用，所以就更加適合小朋友在轉季時節飲用！
材料很簡單，只需要蘋果3個、雪梨3個、雪梨乾3-4片、雞心紅棗8粒、蜜棗4粒、南棗5-6粒。
雪梨乾、紅棗、蜜棗及南棗浸洗一陣，紅棗要去核洗淨。蘋果和雪梨去芯洗淨切塊。
新鮮雪梨即使去清了個芯都一定有少少酸味，這就是新鮮雪梨的特性，所以加幾片雪梨乾就可以中和了那陣微酸味！
因為嶠媽屋企冇大煲，所以只用2L煲來煲，煲內放水，然後加入所有材料。待煲滾後，用大火加蓋煲15分鐘，再轉小火加蓋煲45分鐘，最後再焗15分鐘，隔渣後就可以飲用！
這個涼茶是芊嶠的至愛，連嶠爸都讚好！加了蜜棗即使沒加糖都夠甜，芊嶠每日都追住要飲，嶠媽唔係成日煮野食都煲得掂，相信難唔到其他媽媽，大家都可以一試👍🏼👍🏼
Search